O director deste blog, Antonio
García Teijeiro, di sempre que el non ten ídolos, nin no deporte nin en
ningún outro eido.
Agás nun caso, xa que todas as regras contan coa súa excepción: o
de José Ángel Iribar Kortajarena, o gran porteiro do Athletic Club.
E nun recente artigo dentro do suplemento cultural Estela, do Faro de
Vigo, reflexiona sobre as razóns polas que Iribar ten sido para el, dende
ben cativo, un deportista e unha persoa especial. Ditas razóns comezan con
cuestións futbolísticas, pero non se deteñen aí, senón que se fan extensivas a
consideracións sobre a personalidade de Iribar, que transcende o terreo de
xogo. Levo escoitando o nome de Iribar de boca de Antonio dende neno, e aínda
que eu non o teña visto xogar en persoa (son novo de máis para iso), o
gardameta vasco tense convertido para min nunha figura cáseque lexendaria.
 |
| José Ángel Iribar |
E por iso, aproveitando o artigo de Antonio e unha visita estival
miña a terras galegas, sentei con el en Gondomar e durante uns corenta minutos,
estivemos a falar das razóns da admiración que sente por Iribar. A conversa,
abofé, levounos por diversos vieiros que van máis aló do Txopo (literatura e
deporte, a comercialización do deporte no século XXI, os valores educativos que
cómpre manter no deporte, etc.) pero que dalgún xeito están inspirados pola súa
figura e a súa actitude perante o deporte e a vida. Deixamos aquí abaixo o
vídeo, que pode atoparse tamén en Anton G.-F., a miña canle de YouTube.
ANTÓN GARCÍA-FERNÁNDEZ
Tsukiko ten 38 anos e leva unha vida solitaria. Considera
que non está dotada para o amor.
Ata que un día encontra nunha taberna o seu vello mestre
de xaponés.
Entre ambos estabelécese un pacto tácito para compartir a
soidade.
Escollen a mesma comida, procuran a compaña do outro e
cústalles separarse, aínda que ás veces intenten escapar o un do outro.
A partir dese encontro casual na taberna a relación entre estes dous personaxes vai evolucionando
dende a amizade ata o romántico e sensual co paso do tempo e desas citas que
non sempre son tal nas que ámbolos dous se comunican tanto a través da linguaxe
verbal coma do silencio ou da comida e a bebida que a cotío comparten en bares
e restaurantes.
"A de Kawakami é alta
literatura", díxome Antonio cando soubo que eu lera esta novela que el xa
coñecía e xa tiña lido. E ten razón: alta literatura na súa aparente
simplicidade e na mestría que Kawakami amosa á hora de debuxar o mundo interior
e a psicoloxía dos seus personaxes.
Na miña canle de YouTube
hai pouco publiquei este vídeo en castelán no que comento un chisco máis en
profundidade esta novela, que dende aquí recomendo a toda a comunidade de Versos
e aloumiños.
ANTÓN
GARCÍA-FERNÁNDEZ
Despois de tratar no mes de outubro a poesía de Álvaro Cunqueiro
no podcast El Envés de la Página, para o episodio do mes de
novembro decidimos escoller un poeta que comparte xeografía con Cunqueiro: o
lucense Luis Pimentel, autor dunha obra poética breve pero intensa tanto en
castelán como en galego. Desta volta, Antonio e mais eu conversamos sobre as
características da poesía pimenteliana, co seu gusto pola música, o axexo da
noite, a influencia de Rosalía e a obsesión pola morte, especialmente a dos
máis cativos. O episodio, como foi o caso no de Cunqueiro, está ilustrado co
recitado dalgúns dos poemas máis relevantes compostos por Pimentel. Deixámolo
aquí abaixo por se pode interesar aos lectores e lectoras deste blog.
ANTÓN GARCÍA-FERNÁNDEZ
Dende hai xa varios anos, levo publicando na miña canle de YouTube
un podcast (ou videocast, como tamén se lle podería chamar) dedicado aos libros
e á literatura titulado, nun requebro cunqueiriano, El Envés de la Página.
Recentemente convencín
ao dono deste blogue de que participase nel comigo, unha vez ao mes, nunha
serie de episodios centrados arredor da poesía de diferentes autores e autoras
que para el fosen de referencia.
Nun principio, como
adoita ser o caso, el non estaba seguro: "Que o programa é en castelán
e eu síntome máis cómodo falando en galego", foi o primeiro dos
obstáculos que puxo. Compréndoo, abofé, pero o programa é en castelán porque,
no contexto dunha canle que ten suscritores en diversos países
castelanfalantes, a idea é facilitar que os contidos cheguen o máis lonxe
posible e ao meirande número de oíntes posible.
Amais, a idea é que
unha grande parte dos escritores e escritoras tratados nestes episodios sexan
galegos. Con ese argumento irrefutábel finalmente convencino e o resultado é
este primeiro episodio, gravado o pasado mes de outubro, no que parolamos en profundidade
sobre a poesía de Álvaro Cunqueiro, sen dúbida un dos aspectos menos
coñecidos e menos celebrados do gran autor mindoniense.
Por se vos interesa,
deixamos o programa aquí abaixo, agardando que, se tedes a oportunidade de
velo, o disfrutedes. E podemos asegurarvos que non é máis ca o primeiro de
moitos episodios semellantes que virán no futuro.
ANTÓN GARCÍA-FERNÁNDEZ
 |
| Foto: Jana McFarlin |
 |
| Foto: Casey Langley |
 |
| Foto: Casey Langley |
