As miñas columnas en A NOSA TERRA (1) "O verbo contaxiar"

 

Hai uns anos tiven a honra de escribir unhas columnas no histórico xornal A Nosa Terra.

Nestas columnas tocaba eses temas que a min me preocupaban en relación coa escola e a lectura fundamentalmente.

Sempre me sentín moi cómodo e encantado de colaborar cunha publicación que endexamais debeu desaparecer.

Por iso, aquí e agora, vou recuperar algunhas delas e vostedes xulgarán o meu punto de vista e a vixencia das mesmas.

 

E comezo coa visión persoal que teño sobre o verbo contaxiar.

Agardo que lles guste.

 

 

           

Antonio G. Teijeiro (Foto Ricardo Grobas)

              

                                       O VERBO CONTAXIAR

 

                                                                                 

 

Contaxiar é un verbo que ten diversas connotacións, non todas positivas. Contáxiannos a gripe ou algunha doenza máis ou menos molesta. Contáxiannos o fervor relixioso, as forzas para realizar algo ou as ganas de non facer nada. Tantas cousas! Pero deixando isto á marxe, gustaríame dicir que contaxiar é un verbo que pode/debe ser conxugado para achegar ou introducir os nenos na lectura. Eu creo na súa conxugación para seducir con textos, rimas, xestos, pausas, silencios, etc. os cativos no eido da literatura. Pódese contaxiar o desexo de ler dende o entusiasmo por aquilo que apaixona: a lectura por necesidade, por pracer, pola beleza, pola función que pode cumprir e, mesmo, pola falta de función que a lectura pode ter. Pódese contaxiar dende o exemplo, poñendo á vista o noso hábito lector, falando de libros cos rapaces, e amosándolles como gozamos coa palabra escrita.Contaxiar para que imiten e, nalgún momento, cheguen a ler en liberdade e sen prexuízos. Contaxiar lendo versos en voz alta, escribíndoos na pizarra ou lendo contos á beira da cama.Contaxiar hábitos, entusiasmos, costumes ou desexos permitirannos vivir o fascinante mundo do libro dun xeito grato e ousado á vez. Se espertamos a curiosidade pola letra impresa, abriremos portas á esperanza duns nenos máis felices e formados. Se contaxiamos a ilusión de saber que hai tras o título dunha obra literaria, estaremos abrindo ventás a esa aventura interior que nos presenta o acto de ler.Contaxiar, en fin, é conxugar o verbo dos soños acochados nas palabras.

      

                                                                                                                   Antonio García Teijeiro

 

 

 

"POR ESO QUISE QUE MIS VERSOS FUESEN DE AGUA": UNHA CONFERENCIA DE ANTONIO GARCÍA TEIJEIRO EN JALEO´22

Mar Benegas presenta a conferencia.

Foi unha experiencia fantástica. Un, que leva participado en innumerables xornadas, congresos e actos literarios e pedagóxicos, sentiuse sorprendido pola organización deste evento.

Todo funcionou coma un reloxo. E a calidade dos relatorios, dos obradoiros e das presentacións resultaron máis que atraentes e dun enorme interese.

 

     Estas Jornadas de Animación a la Lectura, Escritura y Observación, celebradas en Valencia (Alboraia) do 12 ao 15 de xullo e que responden ao nome de JALEO, impresionáronme pola calidez, o afecto e a seriedade con que se desenvolveron.

 

     Un grande equipo dirixido por Jesús Ge, Mar Benegas, Silvia García e Ceci Cupello foi o eixe principal para que os asistentes sentísemos que estabamos nun lugar privilexiado, tanto humana coma fisicamente, pois o Monasterio de San Miguel de los Reyes, o lugar onde se desenvolveron as xornadas, é un lugar moi especial e dunha beleza extraordinaria.

Todo funcionou de marabilla e sentimos axiña a maxia da literatura.

 

     O meu cometido nestas Xornadas era impartir dous obradoiros poéticos e dar unha conferencia o derradeiro día.

O título da mesma respondía ao meu percorrido poético-vital a través dos anos, nos que a miña poesía se foi configurando. O seu título, “Por eso quise que mis versos fuesen de agua”. Presentada con moito agarimo por Mar Benegas, debo recoñecer que me sentín moi próximo en afectos ao auditorio.

E resulta que, sen sabelo eu, a miña admirada Reme Gadea gravou o meu discurso e hoxe Versos e aloumiños preséntao na súa totalidade. Aquí o tedes.

Grazas, Reme, por seres tan agarimosa.

As palabras de Antonio García Teijeiro no valo de Pereira Produtos do mar

 

É a frase do escritor vigués e Premio Nacional de Literatura, Antonio García Teijeiro, que durante os vindeiros meses ilustrará o valo que Pereira Productos del Mar ten nas súas instalacións de Vigo

“As nubes deixan no mar bicos e versos para soñar”

• Antonio García Teijeiro escribiu tres frases e os seguidores de Pereira nas redes sociais votaron pola que máis lles gustaba
• O valo de Pereira cumpre 11 anos cunha temática que sempre relaciona a cidade de Vigo co mar, a pesca e os seus produtos

Foto "A movida"

Vigo, 14 de xuño de 2022.- “As nubes deixan no mar bicos e versos para soñar” é a frase elixida este ano para ilustrar o valo que Pereira Productos del Mar ten nas súas instalacións da Avenida de Beiramar. O escritor vigués e Premio Nacional de Literatura, Antonio García Teijeiro, é o autor desta mensaxe. Pereira seleccionou tres frases do escritor relacionadas co mar e convocou un concurso nas súas redes sociais para que os seguidores elixisen a que máis lles gustaba. “O mar non ten paredes. Por iso inventa mil horizontes” e “Cando a lúa chama o mar, deixa a voz na beiramar”, foron as outras dúas frases que competiron coa gañadora.

Ruy Andrade Pereira introducindo o acto

“Esta fermosísima frase vai ser a protagonista do noso valo durante o vindeiro ano. Con esta iniciativa, que levamos realizando dende hai máis dunha década, queremos por en valor a importancia da literatura galega, tan nosa e tan importante no desenvolvemento da nosa cultura e da nosa sociedade. Queremos agradecer a Antonio García Teijeiro que quixera sumarse a familia de escritores galegos que durante os últimos anos participaron no noso valo”, apunta Ruy Andrade, Director de Comunicación de Pereira Productos del Mar.

Durante o evento de presentación Antonio García Teijeiro expresou sentirse moi feliz vendo no valo os seus versos, “agradezo fondamente que pensasen en min para que a miña voz lles fale ás persoas nun valo que xa leva moita literatura enriba ao longo dos anos. Con este proxecto tan noso, Pereira Productos del Mar demostra que hai maneiras diferentes e luminosas de facer publicidade. Poñer no valo das instalacións que ten a empresa en Beiramar frases ou versos de escritores e escritoras de Galicia é facer país. E que sexa en galego, aínda máis. É este un proxecto que se converte nunha aperta cálida á nosa cultura, á nosa literatura e á nosa lingua. É humanizar galeguizando a súa oferta. É algo que abre fiestras a horizontes máis ricos e auténticos e que axuda a facer Galicia”.

AGT diríxese aos asistentes. (Foto A Movida)

Antonio García Teijeiro quixo poñer en valor a iniciativa de Pereira Productos del Mar, “a empresa valora o nivel cultural da nosa terra e faino dun xeito que acariña sensibilidades. Non son moi frecuentes no tecido empresarial este tipo de propostas e hai que aplaudilas. É unha proposta valente nos tempos que corren para o idioma galego. É dignificalo, facelo visible e axudar a querelo. É o galego dos poetas, pero tamén dos mariñeiros, das persoas que viven do mar, da sanidade, da educación, dos traballadores e traballadoras en xeral. É querer e vivir o noso. Conciencia de sermos quen somos. Grazas a Pereira Productos del mar por facernos sentir orgullosos do que amamos.”.

 

 

AGT con José Enrique Pereira e Ruy Andrade ao final do acto

 

Domingo Villar, moi presente

Este acto quixo converterse tamén nunha pequena homenaxe ao escritor Domingo Villar, recentemente falecido e que formou parte da familia de escritores e poetas que durante os últimos anos colaboraron coa iniciativa de Pereira Productos del Mar. 

Domingo Villar

“Podo temer a morte, pero non quero ter medo a estar vivo” (2020) do libro “O último barco” e “O tempo, o sol e o mar engurraran o rostro do mariñeiro e cuartearan a súa pel como terra seca” (2019) da obra “A praia dos afogados” foron as frases das obras de Domingo Villar presentes no valo de Pereira durante dous anos consecutivos, en 2020 e 2019, respectivamente. “A perda de Domingo Villar é fondísima, foise un dos referentes da literatura galega pero sobre todo unha persoa dunha gran calidade humana, sempre estará no noso recordo”, comentou emocionado Ruy Andrade.

Once anos de poesía

“As nubes deixan no mar bicos e versos para soñar” toma o relevo a “O mesmo mar fai cada día unha distinta praia” da poeta Yolanda Castaño que estivo no valo durante o ano 2021. Anteriores foron as frases de Domingo Villar en 2020 e 2019. “Neste mar navegan os barcos da nosa vida” da escritora viguesa Ledicia Costas foi a mensaxe seleccionada en 2018. “Estamos en la bahía de Vigo y sólo de usted depende que pueda conocer sus secretos” da obra de Julio Verne “20.000 leguas de viaje submarino” ilustrou a valle en 2017. “A maxia de saber amar” (2016) y “Cada palada cuenta” (2015) foron outras das frases que os viandantes en condutores que pasaban por Beiramar puideron desfrutar e que foron propostas e votadas polos seguidores nas redes sociais.

Últimos carteis do valo

Desde 2012, ano no que naceu a iniciativa e ata 2014, estas foron as frases que seleccionou a empresa por orde cronolóxico: “No importa el frío, no se nos congelará el corazón”, “Un mar de sabores” y “Este mar nos ha llevado al mundo”.

O acto de presentación do valo tivo lugar este venres a bordo do barco da Armadora Pereira “Argos Pereira” dende o que se podía ler a frase e o deseño do valo deste ano. O acto contou tamén cos gañadores do concurso activado nas redes sociais para seleccionar a frase do valo así como responsable da empresa.

Antonio García Teijeiro

Antonio García Teijeiro naceu en Vigo en 1952. É especialista en literatura infantil e xuvenil e imparte cursos de animación á lectura, creación literaria, talleres de poesía e conferencias. No VI Simposio sobre Literatura Infantil e Lectura da Fundación Germán Sánchez Ruipérez, o seu libro “Versos de Agua” foi elixido entre os 100 mellores libros do século XX. Co seu libro “Poemar o mar”, que forma parte dunha triloxía na que o mar é o protagonista e está escrita en galego, foi merecedor do Premio Nacional de Literatura Infantil e Xuvenil. Ademais, conta co Premio Merlín por "Na fogueira dos versos" (1996), co Premio Europeo Pier Paolo Vergerio, promovido pola Universidade de Padua (1998) e co Premio de poesía “Illas Sisargas” polo poemario “Arredor do teu corpo” (2006). Antonio García Teijeiro foi recoñecido como Vigués Distinguido en 2018 pola súa contribución á literatura infantil e xuvenil galega.

 

 

 

Foto A Movida