REMUÍÑO DE LIBROS (81) "O corazón dos paxaros", de Xerardo Quintiá

 

O corazón dos paxaros

 

Xerardo Quintiá

 

Ilustrado por Nuria Díaz

 

Edicións Xerais de Galicia. 2023

 

 

A dedicatoria do libro xa indica o camiño por onde transita O corazón dos paxaros, unha fermosa, sinxela e directa historia, escrita por Xerardo Quintiá e ilustrada belidamente por Nuria Díaz: “A todas as persoas que aman a natureza e a queren viva e ceibe”.

 

Crisantemo, un velliño que ama os paxaros e vive nunha casa coas paredes tortas e á que non lle puña portas, séntese feliz cando os oe trilar. Debúxaos nun caderno que sempre leva canda el. Vive en Vilachosca, onde hai unha camarilla de cazadores que disparan aos paxaros e o noso protagonista failles fronte, porque non pode aguantar que disparen e que cada vez nas inmensas fragas do lugar vivan menos paxaros.

Diso vai esta preciosa historia: unha alegación contra a caza. Un intelixente planteamento do autor para concienciar destes actos.

O corazón dos paxaros móvese entre o humor e o compromiso coa natureza. Neste álbum ateigado de humanidade atopamos un discurso literario excelente no formal, un motivo para falar da importancia dos animais e como nos relacionamos con eles, ademais de gozar do traballo espléndido de Nuria Díaz, cunhas imaxes moi coloristas, cheas de vida e dunha enorme expresividade.

 

Xerardo Quintiá. Foto Xerais

Unha historia para ler tamén en voz alta, moi poética, cun ritmo axeitado ao desenvolvemento do relato.

Fixéronme graza os xogos de palabras dalgúns nomes (Os Dis-para- dores ou Dionisio Tira Parriba, por exemplo) e estou seguro de que fará as delicias de pequenos e maiores.

Un acerto, sen dúbida, de Xerardo Quintiá e de Nuria Díaz, para remover conciencias, provocar a reflexión e facer boa literatura acompañada por unhas ilustracións cheas de vida. Non é doado e é algo que se agradece.

 

 

                                                                                                       Antonio García Teijeiro

REMUÍÑO DE LIBROS (28) "Grisela", de Anke de Vries e Willemien Min (ilustracións)

TÍTULO :  Grisela.

AUTORAS: Anke de Vries (texto) e Willemien Min (ilustracións)

EDITORIAL: Kalandraka. COLECCIÓN: Demademora.

Grisela é unha fermosa historia que a editorial Kalandraka lles achega aos primeiros lectores en galego. As súas autoras, a escritora holandesa Anke de Vries e a ilustradora, tamén holandesa Willemien Min son recoñecidas dentro do mundo da Literatura Infantil.

     

Anke de Vries

     Trátase dun álbum ilustrado cuxa protagonista é unha pequena rata gris chamada Grisela. Esta sente un día a tristeza e coma non lle gusta esta emoción, decide pintar de cores alegres e rechamantes, de liñas ou puntos a súa pel gris, pero en vez de sentirse mellor, o que recibe son as burlas daqueles cos que se atopa, ao considerar que vai disfrazada. Será grazas á intervención dunhas abellas como descubra a fermosura da súa pelaxe gris.

     

     A partir desta trama sinxela, a autora Anke de Vries amósalles aos nenos que todos somos diferentes e que as nosas diferezas non deben ser motivo de burla por parte dos demais porque o importante é estar a gusto con un mesmo.

     Conto que chega aos lectores porque lles fala de sentimentos e emocións que lles son familiares a partir de personaxes animais humanizadas, tanto nos seus costumes coma na maneira de comportarse. Tamén os axuda a espertar a empatía cara ao outro, ao mesmo tempo que recoñecen sentimentos próximos coma a tristeza ou a ledicia, xogando con conceptos concretos e a simboloxía das cores.

     En definitiva: a autenticidade fronte á imitación coma camiño cara á felicidade e a aceptación das diferenzas coma canle  de coñecemento.

Willemien Min

     As expresivas ilustracións de Willemien Min dotan de vida as personaxes, ao centrarse nelas empregando trazos humanos e mesturando, ademais da colaxe co papel, a cor negra coas demais sobre o fondo branco.

                                                                                                       ALBA  PIÑEIRO

REMUÍÑO DE LIBROS (25) "Ernesto e Celestina. Músicos da rúa".

TÍTULO: Ernesto e Celestina. Músicos da rúa.

AUTORA: Gabrielle Vincent.

TRADUCIÓN: Tamara Andrés.

EDITORIAL: Kalandraka. COLECCIÓN: Tras os montes.

Grazas ao labor editorial de Kalandraka, os primeiros lectores poden coñecer a Ernesto e Celestina na nosa lingua. Ernesto e Celestina son dous personaxes entrañables que na década dos oitenta tiveron a súa aparición da man de Gabrielle Vincent. Este é o nome artístico baixo o que se agocha a respectada pintora belga Monique Martin.

 

Gabrielle Vincent

     

    Ernesto e Celestina. Músicos da rúa, é un fermoso e suxestivo álbum ilustrado que forma parte dos trinta libros que a autora publicou nos que os seus protagonistas son o bondadoso e preguiceiro oso Ernesto e a vitalista e intelixente ratiña Celestina. Cada libro conta unha aventura entre os dous amigos tan diferentes, non só no aspecto físico, senón tamén na personalidade, pero que se complementan perfectamente.

     Neste caso, deciden facerse músicos da rúa e así conseguir os cartos suficientes para poder arranxar o tellado da súa casa. Despois de ter probado distintas opcións, decátanse de que se traballan xuntos, o resultado é máis doado e mellor.

A través dunha linguaxe textual sinxela, clara e directa sustentada nos diálogos dos personaxes descubrimos o valor da amizade, a xenerosidade, a tenrura e a grandeza das pequenas cousas como base da felicidade.

     As ilustracións non son un mero acompañamento textual, senón que forman parte del. Destaca a simbiose entre o texto dialogado e o visual, de tal xeito, que, ás veces, a lectura plástica substitúe a verbal. Trátase de marabillosas imaxes pictóricas en acuarela e con debuxos de trazos e tonalidades suaves que  atraen a atención do lector e achegan información baseada en detalles, que non escapan aos ollos dos nenos.

                                                                                                            ALBA PIÑEIRO

"VAITE XA! ", UN FERMOSO ÁLBUM DE MARCOS VISO QUE FALA DO DESARRAIGO FAMILIAR E SOCIAL

Gústame que na LIX non se lles agochen aos nenos temas que están ao seu redor. Se pensamos que literatura é vida, non debemos estar de costas a certas realidades. O que si hai que ter presente é a maneira de contar. Sutileza, elegancia, agarimo, intelixencia… son algúns dos substantivos que me veñen á cabeza se falo destes asuntos.

    

     E isto é o que fai Marcos Viso no seu precioso álbum Vaite xa!, que edita Edicións Xerais na súa colección Merliño. E ademais Marcos Viso, como grande ilustrador que é, acompaña o seu texto cunhas imaxes fermosísimas. Un reto interesante.

    

     Oso está preocupado porque nos últimos meses a horta convertérase nun cadaleito, levándose por diante a ilusión. Oso, perante a situación de necesidade, terá que partir na procura dun traballo mellor. E iso supón  partir e deixar a Osa e mais a Osiña no fogar e traballar lonxe, algo que lle doe fondamente.

    

Ilustración do libro

     A Oso xórdenlle dúbidas e a dor invádeo ao tomar esta dura decisión. O desarraigo familiar é un tema que o autor plantea nesta obra. A emigración, sempre presente no devir dos pobos, deixa a súa pegada no texto. Un texto que trata un tema real, doloroso, pero que o autor envolve en lirismo. Oso sofre os medos, as dúbidas, as determinacións, as incertezas, pero sen perder un fío de esperanza na súa decisión.

 

Marcos Viso

     Marcos Viso conta unha historia que reflicte, xaora, uns feitos que están a padecer os seres humanos. E faino, na dobre vertente de escritor-ilustrador. Sae moi airoso do reto. Emprega unha linguaxe sinxela, directa, cun ton lírico que engaiola. Axilidade e emoción apálpanse ao longo das súas páxinas. E ilustra o texto con perspectivas diversas, primeiros planos, detalles precisos e con obxectos que simbolizan situacións e sentimentos.

     

     Un acerto este planteamento cheo de tenrura, que nos permite imaxinar un todo con eficacia. Marcos Viso crea un ambiente engaiolante e obríganos a camiñar descubrindo espazos varios (de aí as diferentes cores empregadas)  segundo os estados de ánimo e dacabalo do sentir máis fondo do protagonista.

     

     Parabéns a Marcos Viso polo que está a realizar. O seu nome xa comeza a figurar entre os artistas máis interesantes dentro da nosa LIX actual.

    Ten un magnífico futuro por diante. E eu alégrome moito.

                   

Ilustración do libro

                                                                             

                                                                                                                            ANTONIO GARCíA TEIJEIRO