PALMIRA G. BOULLOSA
(Vigo, 1941)
ARROLOS
O meu neno está no berce,
os olliños vai pechar,
canta o moucho, cae a noite,
o meu neno dorme xa.
*
Miña meniña pequena,
tesouro da súa nai,
durme loguiño, meniña,
que che canto o anainai.
TRABALINGUAS
Porque sabes que che quero,
queres que che queira máis.
Quéroche máis que me queres,
¿ que máis queres, queres máis?
*
- Podador que podas parra,
¿ti podas parra
Ou parra podas toda?
- Nin podo a miña parra,
nin a miña parra podo,
que podo a parra
do cura de Lodo.
MENTIRAS
Sementei na miña horta
a semente dun repolo,
Que me naceu unha ovella
cunha pataca nun ollo.
*
Aló enriba naquel monte
teñen un porco colgado,
e os que queiran chourizos
que lle tiren polo rabo.
(Do libro Cando o Rei por aquí pasou. Libro do folclore infantil galego. Ed. Xerais. 1997)
