Gravación da conversa entre Antonio García Teijeiro e Rafael Narbona arredor do "Elogio del amor", no Club FARO de VIGO

No Elogio del amor, o novo libro de Rafael Narbona, o autor preséntanos a súa visión do que constitúe o amor.

Narbona interpreta este sentimento nas súas distintas vertentes, recorrendo ao seu imaxinario relacionado coa cultura popular en forma de películas, música, libros e fitos históricos xeracionais, pero tamén facendo referencia a súa propia experiencia vital e aos pensadores que deron forma ao seu pensamento.

É un libro que nos permite entender que o amor, máis alá da súa connotación romántica, é forza impulsora necesaria para ser felices e dar felicidade.

Antonio García Teijeiro e Rafael Narbona antes do acto (Foto José Lores)

Rafael Narbona (Madrid, 1963)  foi profesor de filosofía e actualmente é un  dos críticos literarios e xornalistas culturais máis prestixiosos de España. (El Cultural, Revista de libros y Lengua…).

Anteriormente publicou, tamén en Roca editorial, un marabilloso libro: Maestros de la felicidad, do que La Vanguardia afirmou que é un ensaio luminoso e perfecto e Jorge Freire escribiu que “ensina, deleita e entretén, estimula a pensar e contaxia a pasión pola filosofía”.

 

Pois ben, o pasado mércores, 15 de outubro, Elogio del amor foi presentado en Vigo, dentro do marco do Club FARO, cunha numerosa asistencia de público.

Conversando sobre o libro. (Foto José Lores)

O autor, mantivo unha interesantísima conversa co escritor vigués Antonio García Teijeiro, que Versos e aloumiños gravou e que ofrece aos seguidores e seguidoras aquí embaixo.

Gozade dunha conversa moi gratificante.

 

Unha vista do numeroso público asistente ao acto (Foto José Lores)

AUDIO DA PRESENTACIÓN DE "Maestros de la felicidad", de RAFAEL NARBONA no CLUB FARO DE VIGO + Vídeo con reseña de A.G:T.

 

Un momento da conversa entre Antonio García Teijeiro e Rafael Narbona

O pasado 10 de abril no Club FARO DE VIGO tiven a fortuna de presentar unha persoa e un libro excepcionais.

O prestixioso escritor, crítico literario e periodista cultural, que foi profesor de filosofía, Rafael Narbona mantivo comigo unha interesantísima conversa arredor do seu libro Maestros de la felicidad. De Sócrates a Viktor Frankl, un viaje único por la historia de la filosofía, editado por Roca Editorial.

 

Rafael Narbona no CLUB FARO

Maestros de la felicidad é , ante todo, un libro sobre a esperanza. Pretende confortar, serenar e curar; ou sexa, exaltar a vida.

Cando rematas de ler esta marabillosa obra, un sente o optimismo e a forza interior para abandonar os intres máis escuros e chegamos a comprender a lucidez nos nosos actos.

É un percorrido polas distintas etapas da historia da filosofía dende o punto de vista do autor, de quen descubrimos emocionantes fragmentos da súa vida que nos animan a superar os atrancos que sufrimos dun xeito optimista como el foi superándoos a través dos anos.

A conversa foi gravada en audio e Versos e aloumiños preséntaa completa para desfrute das e dos nosos lectores.

Podedes ver ademais o vídeo cunha reseña miña sobre Maestros de la felicidad, que fixen para a canle de Antón García Fernández, incluída na sección El envés de la página.