HELENA VILLAR JANEIRO (Becerreá, 1940)
O SOUTO…
O souto do anano
ten unha cancela
para o xabaril,
para a donicela.
Para o ourizo cacho,
para o escaravello,
para o paporrubio,
e para o coello.
Para o porco bravo,
a pita do monte,
o moucho, o lagarto,
o corzo e o golpe.
A ARAÑA…
A araña tece
moi tecelá,
dálle que dálle
no seu tear.
E vai sacando
pouco a pouquiño
mantas de prata,
sabas de liño.
CANTA O…
Canta o malvís
e mais o ouriol.
O peto acompáñaos
tocando o tambor.
(Do libro O souto do anano, editado por Alfaguara Obradoiro. 2007)
