CATAVENTO DE POEMAS INFANTÍS (LXI) "Os días lebre", de Clara López

                                         CLARA LÓPEZ (Areas de Tui, 1968)

Sentar a perder a guerra

O meu avó Hermenexildo cando foi maior,

volveuse soldado.

Clara López

E despois, coas súas guerras, foi ao ceo,

ou a Madagascar,

non me dixo onde,

e mira que lle gustaba contarme as cousas

como se fosen de chocolate,

cheas de pausas e de anacos,

a onzas, mesmo as guerras.

Nunha das súas batallas perdeu un brazo,

e despois co tempo, a memoria,

mais as guerras sabíaas enteiras,

non as perdía nunca,

e contábachas unha vez,

e outra vez,

e outra,

coma se fosen mentira.

Demo

Odio que os días leven nome,

tamén en inglés,

e que os teña que saber,

e en orde.

Agardo unha guerra de días,

que se rebelen,

se confundan,

se disparen,

se disipen,

se comparen,

e se vexan,

como son,

todos,

outra vez,

exactamente,

iguais.

Para sentar un sentimento

Sentímolo mais,

para sentar un sentimento,

hai que buscar un día,

e saber

Ilustración de Marcos Viso

que os sentimentos son voadores,

pequenos paxaros ou insectos,

e que o mellor momento para sentalos

é cando se pousan.

Hai que facelo con moito tento,

escorregando os pincéis

coma lapis,

coma dedos,

intentando pintalos

ou escribilos.

Pintado ou escrito,

un sentimento é inofensivo,

coma un pemento.

Pero se te equivocas,

e non o sentas,

e o sentes,

vólvese moi perigoso,

máis cá selva ou ca unha bomba,

pois estoura ou roxe,

directamente ao corazón.

(Do libro Os días lebre, editado por Kalandraka Editora, 2017)

REMUÍÑO DE LIBROS (27) "Avións de papel", de Xavier Estévez

TÍTULO: Avións de papel.

 

AUTOR:   Xavier Estévez.

ILUSTRACIÓNS: Marcos Viso.

EDITORIAL: EDICIÓNS XERAIS. COLECCIÓN: Merlín.

Avións de papel é unha engaiolante e fermosa novela que a editorial Xerais lles achega aos lectores preadolescentes da man de Xavier Estévez e que vén avalada por ser finalista do Premio Merlín de Literatura Infantil, 2016.

     Trátase dunha novela iniciática e lineal a través da cal os seus protagonistas van dar o salto da nenez á madurez, descubrindo que a vida non sempre é como un desexa e que hai situacións e circunstancias  coas que temos que aprender a convivir por moi dolorosas que nos resulten.

 

Xavier Estévez

     Ao longo das súas páxinas o autor introdúcenos, a partir das voces narradoras dos seus protagonistas, nunha viaxe a través da emoción xurdida da arte plástica urbana, da palabra poética, da xenerosidade que vai ao carón da amizade, á vez que nos convida cara a un mundo máis humano, solidario e xusto.

      A trama comeza cando Lucas, un neno de once anos, espelido e curioso, pero tamén solitario, ás veces non por gusto, decide coñecer a persoa que fai voar avións de papel, sempre á mesma hora e dende a mesma fiestra dun alto edificio. Deste xeito coñece a Sara, unha nena da súa idade que vai en cadeira de rodas e coa que comparte o gusto pola lectura e a escrita. O que comezou coma un encontro casual vai converterse nunha fonda amizade chea de complicidades e descubertas. Entre os dous lograrán saber a identidade do misterioso Hopper, artista urbano que cos seus graffitis e murais contribúe a darlle vida á cidade na que viven. Pero co que non están de acordo as autoridades e certos veciños.

     Novela que abre as portas á imaxinación, á reflexión e ao debate e que nos amosa un percorrido da arte urbana de Vigo e outras localidades galegas na nota do autor, a xeito de epílogo.

 

Fermosa ilustración de Marcos Viso

     As vivas e suxestivas ilustracións de Marcos Viso están en perfecta sintonía co ton textual e engádenlle unha lectura plástica que complementa a historia narrada.

                                                                                                      ALBA  PIÑEIRO