martes, 16 de abril de 2013

ESCAPARATE POÉTICO (V). Lupe Gómez Arto





LUPE GÓMEZ ARTO ( Mundo de Fisteus, 1972)


O AMOR

O amor foi
un trallazo moi forte
que rompeu a
ventá. E quedou rota
para sempre. Eu limpei
do chan
os cristais. Corteime
con eles
en tódolos dedos.


 

MONECAS “NANSI” LOIRAS

Nunca houbo montañas
nas miñas monecas.
Eran totalmente planas
e azuis e poñíalles
vestidos para adornalas,
para rirme delas,
disfrazar as miñas bágoas,
saltar sobre a cociña
con catro pés. Soñaba
con ter moitas caras
e deixar de ser lista.




CHORAS?

Chora
ata que
sangres.




GLOBALIDADE

Todo é un espello
e son fronteiras. Quero
mirarme nelas
e cruzalo.


     


 (Do libro Pornografía, editado por Edicións Positivas, 2012)