RAÚL GÓMEZ PATO
(1966, Velle – Ourense)
MERLO
Abrochou un absceso lóbrego no teu
canto,
Poeta inservíbel,
Un indicio que semella residuo de
papel hixiénico,
Por moito que te empeñes,
Afónico merlo,
En contrastar as túas ás pretas de
tinta
Contra o solpor dourado do papel,
Considerándote un acorado tigre
Que cicela na súa pel
As raias que os vocábulos
Van dispersando na túa acrobacia
fútil.
Vai calando xa,
Desafinado paxaro.
Atópaste canso.
Mañá será outro día.
ELEFANTE
Ti dedícaste a facer a guerra pola
túa conta
E eu sigo a combater recordos,
Enormes coma cranios de elefantes,
Que xa teñen empenada a madeira
Dos andeis onde os fun acumulando
Antes que a couza os mastigue.
(Do libro Tratado de Zooloxía para corazóns mancados, editado por Positivas, 2009)
