Mostrando entradas con la etiqueta revistas de LIX. Mostrar todas las entradas
Mostrando entradas con la etiqueta revistas de LIX. Mostrar todas las entradas

viernes, 15 de enero de 2016

CRÍTICA DE MONTSE PENA PRESAS SOBRE "Lendo lendas, digo versos" NO NÚMERO 2 DA REVISTA DE LIX "CRIATURAS".



Acaba de aparecer o número 2 da revista de LIX galega CRIATURAS.
     Unha interesante publicación dixital galega e en galego coordinada por Ledicia Costas e Daniel Landesa e que ten un consello editorial de luxo formado por persoas moi significadas no eido literario infanto-xuvenil.
     
     Imprescindible achegarse a ela e saber algo máis de todo o que se publica no noso país, dos autores/as e ilustradores/as, dos acontecementos literarios e saborear os artigos que contén e que nos permiten entrar no interesante mundo da literatura para os pequenos que se fai en Galicia.

     Neste número podemos gozar dunhas fermosas ilustracións de Noemí López, dun artigo magnífico de Antonio Reigosa sobre “As boas criaturas do nadal galego”, unha interesante achega a un proxecto que paga a pena coñecer como é “Espazo Lectura”, un cara a cara entre Antonio Manuel Fraga e Miguel Mosqueira, recensións e críticas de libros, ademais doutros moitos temas de interese.
     
     Entre os libros que se salientan neste número está o noso querido “Lendo lendas, digo versos”, do que a especialista en LIX Montse Pena Presas escribe unhas palabras que nos enchen de satisfacción.


     Reproducimos aquí a crítica, un traballo que Versos e aloumiños agradece profundamente.

Montse Pena Presas


Dos imprescindibles: Lendo lendas, digo versos de A. Reigosa, A. García Teijeiro e X. Cobas 


Este final de ano deixounos un dos mellores libros infantoxuvenís do 2015: Lendo lendas, digo versos, unha obra creada a seis mans por Antonio Reigosa (que se ocupa das narracións), Antonio García Teijeiro (como creador dos versos) e Xosé Cobas (que consegue trasladar ese poderoso mundo mítico a unhas imaxes particularmente evocadoras). 

     O principal acerto da obra, a súa innovación máis poderosa é precisamente a de acertar a reunir, nun só volumen, o inxente coñecemento de Reigosa do mundo da tradición popular galega, a axilidade rítmica e musical dos poemas de García Teijeiro e a facilidade de Cobas para levar ao lectorado cara a universos oníricos, nos que calquera suceso é posible. Tres voces consolidadas construíndo á vez para devir nunha plurisignificación que, non obstante, semella ter sido argallada tan só por un creador (tal é o encaixe que acada nestas páxinas o entrecruzamento xenérico). 
   
Nun acaído limiar, os autores explican que 
se decataron da ausencia de poemas protagonizados por personaxes míticos galegos de tradición popular, polo que se decidiron a embarcarse (e embarcarnos) nesta aventura. 
     Así, as lendas recollidas tentaron manter a súa forma máis pura (se ben se albisca o adobío da escrita precisa e retranqueira de Reigosa, que é sempre estilísticamente coidada); namentres que as composicións poéticas trasladaron o sucedido nos relatos ao verso. Porén, as estrofas de García Teijeiro (sen perder a esencia clásica deste poeta) non sempre se conforman con iso, senón que en ocasións xogan a engadir novos detalles á lenda, o que as fai aínda máis interesantes. Igualmente, a súa lóxica narratividade, acompañada da facilidade na comprensión (que se apoia precisamente no texto narrativo) pode supoñer un estímulo para aqueles e aquelas que aínda non se decataron (en palabras de Fran Alonso) de que “a poesía non morde” e que cómpre perderlle o medo ata retala. 

     A escolla de personaxes míticos e de lugares máxicos resulta tamén moi acaída. O texto privilexia seres ben coñecidos (como os reis ou as mouras), mais sen caer nos tópicos (o encontro con estes personaxes non supón inmediatamente un suceso malo ou bo, senón que serán os feitos posteriores o que determinarán isto). Canda estes caracteres aparecen outros quizais menos difundidos, pero con historias realmente sorprendentes e en moitos casos, moi descoñecidas. A sorte é que cada quen pode procurar o seu texto, o que máis lle suxire ou lle sorprenda, o que lle ensine ou lle evoque algo. 
      
     Quen isto escribe, queda con “As tres bestas da Charca de Alligal”, quizais polos poderes curativos que amosa ter a auga, quizais polo poder feminino manifesto no personaxe da meiga, quizais polo perigoso que é o mal de amores ou quizais pola suxerentísima ilustración que, nunha variación, aparece na portada. Porque unha besta pode ser fermosa, pois a tradición popular ensina, entre outras moitas cousas, que ás veces aparece o branco onde todo semella negro. 
      
     A suxestividade das ilustracións (entre o que vemos e o que pensamos, con grande capacidade para captar a fotografía do que non foi), os acaídos versos (que rematan, profundizan e matizan a un tempo) e as intrigantes lendas (recollidas coa palabra xusta e lixeira) acaban por conformar un volume imprescindible. Pola súa beleza formal, mais tamén pola súa variedade textual e pola súa (re)creación da propia tradición, Lendo lendas, digo versos debese ser un referente. Porque cómpre non esquecer que, antes de que existise palabra escrita, todas e todos escoitamos a maxia dunha voz que nos fixo soñar, mais tamén aprender. 

miércoles, 18 de febrero de 2015

PEONZA: "A VOLTA AO MUNDO EN 90 NOVELAS GRÁFICAS":

      Contra finais do pasado ano recibín o último número da prestixiosa revista Peonza correspondente ao mes de outubro de 2014.


     Un monográfico interesantísimo sobre a novela gráfica. O seu título: “La vuelta al mundo en 90 novelas gráficas”.

     A ninguén se lle escapa o auxe da novela gráfica resulta un fenómeno editorial que non ofrece a menor dúbida.

     Hai quen non lle gusta esta denominación, pero ninguén nega que a presenza deste xénero nas librarías, nos medios e cun público emerxente que as le, é unha realidade.

     Podemos dicir, sen ningunha dúbida, que a calidade é algo patente nun bo número delas.

     As novelas gráficas (nós imos chamalas así) posúen unha evidente diversidade temática e estilística. Así o deixa claro o editorial deste monográfico de Peonza e estamos totalmente de acordo con esta afirmación.


      Nestes libros podemos atopar toda clase de temas: dende os problemas e conflitos sociais ata os políticos e persoais do noso tempo e do pasado.
E o xeito de presentalos ao lector pode ir da reportaxe periodística á investigación histórica, das crónicas autobiográficas ás reconstrucións colectivas.
Explica o editorial da revista moi ben estes aspectos,e fai fincapé “na pluralidade de estilos e propostas estéticas, non todas acertadas, pero en moitos casos innovadoras”.


      Neste número (o 110 de Peonza) coméntanse case un centenar de obras creadas e ambientadas en países diferentes dos cinco continentes.
Están representados autores/as de países tan diferentes como Cuba, Afganistán, Corea do Sur, Paquistán, Grecia, Groenlandia, Italia, Palestina, Marrocos, Ruanda, España, Tíbet, Vietnam, Turquía ou os Estados Unidos entre moitos outros. Así, unha obra por país ata 90.
A selección é ampla e variada. Dá unha visión moi rica das creacións gráficas que se están a producir neste ancho mundo. Isto indica a grande expansión a nivel internacional da novela gráfica e a gran difusión destas obras. Unha viaxe suxestiva polo planeta da narración gráfica.
Nas páxinas da revista encontramos artigos dunha calidade incontestable.
 
"Deogratias" (Jean -Philippe Stassen)

     Yexus, especialista e crítico de cómic, fálanos da evolución recente do cómic español dende diversos puntos de vista: o do artista, o do lector, o das empresas editoriais, o da consolidación cultural do medio, o das canles de venda, o dos formatos ou a repercusión nos medios de comunicación.

      Gerardo Vilches escribe sobre a novela gráfica e o cómic de autor contemporáneo. Este especialista e crítico aclara o sentido da denominación do xénero a partir dun punto de vista expresivo e sitúaa no contexto da evolución da industria, dende unha perspectiva histórica, ademais de presentarnos unha ampla nómina dos autores máis salientables do fenómeno.

      

     Juan Gutiérrez Martínez-Conde, do Equipo Peonza, expón o contido do número e xustifica a decisión do equipo de redacción de dedicar este espazo a un fenómeno tan significativo coma o da novela gráfica no século XXI.

     Tras unha presentación ben argumentada, especialistas do xénero comentan esas noventa obras, engaden unha pequena biografía do guionista do título e do debuxante, se non é o mesmo, e acompañan estas liñas con senllas reproducións dalgunha páxina da obra.

     Unha marabilla.
     Un verdadeiro luxo.
     Unha guía de valor incalculable.

     Salientar, ademais, o artigo “Un silencio elocuente” do meu querido e admirado José Luis Polanco, no que puntualiza, a partir dunhas lúcidas palabras de Julio Ramón Ribeyro, que a tarefa dos creadores –xa sexan escritores, artistas, pensadores, poetas- é escrutar o misterio do noso ser, ordenar as pezas dispersas do complicado puzle, axudarnos a entender o mundo e a nós mesmos.

 
"La ciudad" (Frans Masereel)
Reflexións estas que se producen por mor dunhas imaxes que Polanco estaba mirando en “La ciudad” (1925) de Frans Masereel, un libro que é unha viaxe pola cidade; unha viaxe que vai mostrando ao lector as diferentes facianas da urbe: dende a ostentación das zonas ricas ata a sórdida negrura da miseria.
Un paseo por rúas e prazas, por teatros, museos, centros comerciais… da man do autor que nos empurra a pensar sobre a realidade da vida.
Atinado, coma sempre, José Luis.
 
Debuxo da mesma obra de Masereel
     Interesante, xaora, a entrevista de Juan Gutiérrez Martínez-Conde e Yexus, a un dos mellores debuxantes europeos, Rubén Pellejero, autor de libros coma “Aprendiz de detective”, “Blues et autres récits en couleur”, “Loup de Pluie” ou “Dieter Lumpen”, entre outros, e de quen son os debuxos que forman a Galería da revista. Beleza para os sentidos.
 
Ilustración de Rubén Pellejero.
     Un número, este de Peonza, imprescindible para todos aqueles (que son moitos) seguidores deste xénero tan florecente e tan presente xa nas nosas vidas. Un número, dende logo, para saber máis e para gardar.

     Unha vez máis Peonza demostra a súa categoría como revista. Demostra os seus obxectivos cunha claridade evidente. Toda unha referencia para os que amamos a LIX.

     Unha verdadeira xoia.

                                                                                                           ANTONIO GARCÍA TEIJEIRO