Oda
a un neno sen rostro
Porque
as ondas do mar
non poden bicarte
só poden chorarte
Non hai tantas bágoas
que poidan mollar
a voz para amarte e
na luz anegarte.
Porque a escuma do mar
ben negra de espanto
non pode abrazarte
nin pode arrolarte
nin pode bicarte...
só pode
soñarte!
Porque ás areas
lles doen as sabas
que cobren os prantos
e tremen as mans
as mans que puideron...
puideron salvarte!
Por
iso, meniño,
eu quero apreixarte
eu quero chorarte
eu quero bicarte
Por
iso, meniño,
eu quero arrolarte
eu quero vingarte
eu quero lembrarte
mais...
non podo salvarte!
non podo salvarte!
ANTONIO GARCÍA TEIJEIRO