TÍTULO: Fred Quincalla, o nómade do mar.
AUTORA: Teresa González Costa.
ILUSTRACIÓNS: Marina Seoane.
EDITORIAL: Edicións Xerais. Colección: Sopa de libros.
Edicións Xerais achégalle ao público infantil esta fermosa
historia da man dunha escritora ben coñecida no panorama da LIX das nosas
letras Teresa González Costa.
 |
| Teresa González Costa |
Desta volta
preséntanos a Leopolda Diéguez unha prestidixitadora das palabras que crea para
o seu amigo, cociñeiro e fuxitivo da
inxustiza o Gran Gogol, a historia
do autómata Fred. E así ,seguindo a tradición oral dos conta contos, viaxamos
ao mundo do noso protagonista Fred.
 |
| Ilustración de Marina Seoane |
Este é un autómata que vive na Illa
Mecánica onde todos os seus autómatas habitantes son perfectos: os seus físicos
e as súas obras non teñen ningún tipo de erro. Tampouco coñecen o significado
de palabras coma o medo, alegría ou tristura. Pero non aturan a Fred porque el
é imperfecto, tanto no seu aspecto externo (feito de anacos de madeira e metal
dun afundido barco pirata), coma na súa maneira de ser: gústalle ler, pensar,
dialogar. Ao decatarse de que non encaixa, Fred decide marchar en busca do seu
sitio. Deste xeito percorrerá diferentes illas e vivirá aventuras nas que coñecerá
en primeira persoa a inxustiza, a intolerancia ou a envexa pero tamén o valor
da amizade, a constancia e o esforzo cotián para conseguir sentirse a gusto co
que un é e ser, deste xeito, feliz.
Teresa González Costa cunha linguaxe clara, directa e non exenta de humor (nos
nomes e nas situacións) perfectamente captado polos lectores infantís,
reivindica un mundo máis xusto, onde o código de actuación sexa polos méritos
persoais, non polas aparencias, onde a discriminación non exista e a
pluralidade sexa a suma dos diferentes elos que conforman a engranaxe da vida.
 |
| Ilustración de Marina Seoane |
As
ilustracións evocadoras, fermosas e vivas de Marina Seoane dotan de cor a vida dos personaxes e complementan o
ton textual.
ALBA PIÑEIRO