MARÍA CANOSA ( Cee. A Coruña, 1978)
CONGRO
 |
| María Canosa |
Vive nas entrañas
das profundidades
por iso non fai
grandes amizades.
É moi escuro,
negro ou mouro
o peixe sen cores
chámase congro.
De corpo redondo
e de carne branca
con tantas espiñas
a moitos espanta.
Vive nas furnas
busca acubillos
por iso é feliz
no barco afundido.
En calquera fenda
atopa pousada,
pero o mellor sitio
é nunha empanada!
ARROAZ
Quen trae as novas
 |
| Ilustración de Dani Padrón |
ao fondo do mar
son o golfiño
e mais o arroaz.
Contentos e ledos
sempre camiñan
ao lado dos barcos
que serven de guía.
Van escoitando
os sabios mariños
e sucan os mares
co longo fociño.
Gústanlle os nenos,
correr e brincar
é inconfundible
a aleta dorsal.
O lombo escuro
o ventre claro,
con só dúas cores
están decorados.
LURA
Non é un peixe,
é un molusco
que ten agochado
o luscofusco.
Falo da lura
que garda no peto
a tinta que o enche
e lixa de negro.
Este saquiño
está coroado
por unha cabeza
e oito tentáculos.
Cando se asusta
e quere fuxir
con tinta escura
vainos tinxir.
Todos os lazos
que ten na cabeza
converten a lura
nunha marquesa.
(Do libro Acuario,
editado por Edicións Embora, 2012)